Pradeep Dhekale (Librarian)

Kamala Nimbkar Bal Bhavan School (Phaltan)

बाल लेखक

मे महिन्याच्या सुट्ट्या संपत आल्या होत्या. आता शाळा सुरु होणार. शाळेच्या पहिल्या दिवशी इयत्ता ३ री चा तास होता. त्यासाठी काहीतरी नवीन करून घेतले पाहिजे होते. जेणे करून मुले त्यात रमणार होती. मग मी ४ /५ दिवसात वर्तमानपत्रातील मला जी चित्र आवडतील व त्या चित्रावरून मुलांना काही लिहिता येईल अशी चित्रे गोळा करण्यास सुरवात केली. ती चित्रे मी एका फुलस्केप पेपरवर चिकटवली. आता माझी पहिल्या दिवसाची तयारी झाली ह्याचा मलाच आनंद झाला.

मी सुरवातीला विचारले “कोणाला लेखक होण्यास आवडेल.” सगळ्यांनी झटकन हात वर केले. मग मी मुलांना ते फुलस्केप पेपर वाटले. मुलांनी काय करायचे ते समजावून संगीतले.

मुलांनी पेपर हातात पडताच लिहीण्यास सुरवात केली. काही मुले चित्रात रमून गेली. माझ्या लक्षात असे आले की ज्ञानेश्वरीला  जे चित्र मिळाले होते त्या चित्रात एक इमारत होती  जिचे प्रतिबिंब  पाण्यात पडलेले होते व ती इमारत पाण्यात उलटी दिसत होती. मी तिला विचारले “तू इमारत पडल्याचे का लिहिले आहेस ?” ती पटकन म्हणाली “ सर… आम्ही बारामतीला जाताना डोळ्यासमोर प्रत्यक्ष इमारत पडताना बघितली आणि ह्या चित्रात देखील इमारत उलटी म्हणजे पडल्यासारखीच वाटत आहे,”

काही मुलांनी त्यावरून कविता लिहिल्या, त्या आम्ही तासाला वाचून घेतल्या. काही बोर्डवर लावल्या. मुले येता जाता वर्णन वाचत होती. त्यातील लेख जोडला आहे.